Հետևեք մեր YouTube-յան ալիքին՝ «Ժամանց & Տեղեկատվություն»։ Ֆեյսբուքյան էջին՝ erkusov.com: Մենք՝ Ինստագրամում։
Ինչ անել, երբ ջերմաչափ է կոտրվել ու տանը երեխաներ կան: ՏԿԱԻՆ ճգնաժամային կենտրոնը նման դեպքերի վերաբերյալ քիչ է ահազանգեր ստանում: Ստեղծված իրավիճակում գործողությունները պետք է լինեն արագ ու հստակ:
Ջերմաչափի մեջ առկա սնդիկի պարունակությունը քիչ է, այսինքն հետևանքները շատ լուրջ չեն լինի, բայց դրանից հանգստանալ պետք չէ:
Եթե կոտրվեց ջերմաչափը, ապա անմիջապես սենյակից պետք է դուրս հանեն երեխաներին, կենդանիներին, պատուհանները բացեն, մյուս սենյակներին միացնող դռները փակեն, որպեսզի այլ սենյակներ այդ օդը չներթափանցի:
Առաջին անհրաժեշտ քայլերն անելուց հետո ՏԿԱԻՆ Ճգնաժամային կառավարման ազգային կենտրոնի օպերատիվ հերթափոխի պետ, փոխգնդապետ Արսեն Մկրտչյանը զրույցում խորհուրդ է տալիս զանգահարել 911, դեպքի վայր մեկնած խումբը կկատարի հետագա գործողությունները:
Իսկ եթե այնպիսի իրավիճակ է, որ հնարավոր չէ կապվել 911 ծառայության հետ, ապա պետք է առաջնորդվել փոխգնդապետի հետևյալ խորհուրդներով.
«Հատակին կամ մեկ այլ տեղ թափված սնդիկի գնդիկները հնարավորինս լավ հավաքելու համար պետք է նախ ձեռնոցներ ու բժշկական դիմակ հագնել, թրջել բամբակն ու պահել գնդիկին հնարավորինս մոտ, գնդիկները բամբակի վրա հավաքվելուց հետո պետք է այն լցնել նախապես սառ ջրով լցված տարայի մեջ: Սնդիկը հնարավոր է հավաքել նաև ներարկիչով, ինչպես նաև կպչուն ժապավենի միջոցով: Անկախ այն բանից, թե ինչով է հավաքվել, պետք է լցվի ջրով լի տարայի մեջ: Խորհուրդ չի տրվում սնդիկը հավաքել փոշեծծիչով: Հավաքելուց հետո պետք է հատակը ախտահանել մարգանցովկայի լուծույթով»:
Եթե սնդիկը թափվել է հագուստի վրա, ապա խորհուրդ չի տրվում հետագայում այն հագնել, առավել ևս լվացքի մեքենայի մեջ գցել: Եթե սնդիկի գնդիկները հայտնվել են մաշկի վրա, ապա պետք է հավաքել վերը նշված մեթոդներով:
Եթե սնդիկը թափվելուց հետո սենյակը չօդափոխվի ու չախտահանվի, ապա սենյակում գտնվողների մոտ հնարավոր է գլխացավ, սրտխառնոց, փսխում, ախորժակի բացակություն, ցավեր որովայնի շրջանում և այլն:
