YouTube-յան ալիք՝ «Ժամանց & Տեղեկատվություն»։ FB էջ՝ erkusov.com: Մենք՝ TikTok-ում: Մենք՝ Ինստագրամում։
Չափավոր օգտագործման դեպքում, ալկոհոլը գրեթե ոչ մի ազդեցություն չի թողնի ձեր օրգանիզմի վրա, հիշեցնում է Medical Daily-ն: Սակայն, երբ չարաշահում եք, հետևանքները կարող են աղետալի լինել:
Ալկոհոլի չարաշահման և ալկոհոլային կախվածության ամերիկյան ինստիտուտի տվյալներով, մեծ քանակությամբ սպիրտը քաղցկեղի բազմաթիվ տեսակներ հրահրելու հատկություն ունի: Մահաբեր հիվանդությունը, մասնավորապես կարող է ձեր բերանը, կերակրափողը, կոկորդը, լյարդը կամ կրծքագեղձը ախտահարել: Բացի այդ, ալկոհոլի չարաշահումը մարդու օրգանիզմի գրեթե բոլոր օրգաններին կարող է նկատելի նկատելի վնաս պատճառել: Ստորև դրանցից հինգն ենք ներկայացնում.
1. Սիրտ
Բոլորս տեղյակ ենք, որ վերջերս իրականացված մի շարք հետազոտություններ այն եզրահանգման են բերել, որ մի բաժակ կարմիր գինին, իր բաղադրության մեջ մտնող հակաօքսիդանտների հաշվին, կարող է սրտանոթային հիվանդությունների առաջացման ռիսկի նվազեցման բերել: Սակայն ի՞նչ կպատահի, եթե մեկ բաժակը մեկ շիշ դառնա: Ժամանակի ընթացքում այն կթուլացնի սրտի մկանները և արյան շրջանառության խանգարումներ կպատճառի: Ալկոհոլ չարաշահողներից և ալկոհոլային կախվածություն ունեցողներից շատերը ծանոթ են կարդիոմիոպաթիա կոչվող վիճակին, երբ սիրտը սկսում է ընդլայնվել ու սեղմվել: Այն ընդհատվող շնչառությամբ, սրտի առիթմիայով (անկանոն աշխատանք), հոգնածությամբ, լյարդի ընդլայնմամբ և անդադար հազով է զուգորդվում: Ալկոհոլի չարաշահումը կարող է նաև սրտի կաթվածի, ինսուլտի և հիպերտենզիայի հանգեցնել:
2. Ուղեղ
Էյֆորիայի զգացումից բացի, ալկոհոլային խմիչքները կարող է նաև խիստ բացասական ազդեցություն ունենալ ուղեղի վրա: Դրանց մեջ առկա էթանոլ սպիրտը, նյարդային հաղորդիչների միջև տեղեկատվական կապը դանդաղեցնելու կարողության շնորհիվ, լուրջ սպառնալիք է ներկայացնում օրգանի բազմաթիվ հատվածների համար: Նյարդային հաղորդիչներին պարբերաբար պատճառված վնասը կարող է պահվածքի և տրամադրության փոփոխությունների` դեպրեսիայի, հիշողության կորստի հանգեցնել: Իսկ ահա, թերսնման պարագայում, Վերնիկ-Կորսակովի համախտանիշը` «խոնավ ուղեղ» կարող է ի հայտ գալ, որի ախտանշաններից են դեպրեսիան, զգայախաբությունը, մկանների կոորդինացիայի կորուստը և նոր հիշողություններ կազմավորելու անկարողությունը:
3. Լյարդ
Մարդիկ լյարդի կարևորությունը թերագնահատելու հակում ունեն: Եվ այնուամենայնիվ, ալկոհոլային կախվածություն ունեցողներից շատերը կհուշեն, թե ինչ գործառույթներ է այդ օրգանը իրականացնում: Խոսքը մարսողության կարգավորման, սնուցիչների կլանման, վարակների վերահսկման և օրգանիզմից թունավոր նյութերի արտազատման մասին է: ԱՄՆ ավելի քան 2 մլն բնակիչներ ներկայումս լյարդի` ալկոհոլի չարաշահմամբ հրահրված հիվանդություններով են տառապում: Բավական է ասել, որ 2009թ. մահացության պատճառների վարկանիշային ցուցակում լյարդի ցեռոզը 12-րդ հորիզոնականն է գրավել: Մեկ այլ ցուցանիշ ևս. Միացյալ Նահանգներում օրգանի փոխպատվաստման սպասող 3 հիվանդներից մեկը ալկոհոլի չարաշահման արդյունքում է աղետալի վիճակում հայտնվել:
4. Ենթաստամոթսային գեղձ
Ալկոհոլի մեծ քանակությունը ենթաստամոքսային գեղձի աշխատանքի խախտման է հանգեցնում: Մասնավորապես, փոքր աղիների համար արտազատվող էնզիմները օրգանի ներսում են մնում և, կուտակվելով, բորբոքում առաջացնում: Այս` պանկրեատիտ կոչվող հիվանդությունը կարող է հանկարծահաս լինել (սուր պանկրեատիտ), որի դեպքում որովայնի հատվածի ցավերը և սրտխառնոցը սրտի արագ աշխատանքով, փորլուծությամբ և բարձր ջերմաստիճանով են զուգորդվում: Իսկ քրոնիկ պանկրեատիտը, որի դեպքում ենթաստամոքսային գեղձն աստիճանաբար քայքայվում է, կարող է շաքարախտի հանգեցնել և նույնիսկ մահացու ելք ունենալ:
5. Երիկամներ
Ալկոհոլի ազդեցությամբ օրգանիզմը մեծ քանակությամբ մեզ է արտադրում, ինչը կարող է երիկամների աշխատանքի խախտումներ սադրել: Այս զույգ օրգաններն այլևս դժվարությամբ են օրգանիզմով հեղուկների հոսքը, հետևաբար` նատրիումի, կալիումի և քլորիդային իոնների բաշխումը կարգավորում, ինչի արդյունքում էլեկտրոլիտների անհավասարակշռություն կարող է առաջանալ: Բացի այդ, ալկոհոլի չարաշահումը արյան բարձր ճնշում է խթանում, ինչը երիկամների աշխատանքի խախտման գլխավոր պատճառներից մեկն է համարվում:
