Կրթության ցածր մակարդակը ավելի վտանգավոր է, քան աղը, ալկոհոլն ու ծխախոտը. հետաքրքիր հետազոտություն

Կերակրի աղի սահմանափակ քանակությամբ օգտագործումը մարդու օրգանիզմին առանձնակի վնաս չի հասցնում՝ պարզել են գիտնականները։ Այ, իսկ եթե մարդը վատ է կրթված, ապա նրա ճակատագիրն այնքան էլ նախանձելի չէ։

Հետազոտությանը, որը ներկայացնում ենք, հինգ աշխարհամասերում, առանց որևէ սիրտ–անոթային հիվանդությունների 35-70 տարեկան 155137 մարդ է մասնակցել։ Հետազոտողները տասը տարվա ընթացքում ուսումնասիրել են ռիսկի 13 գործոնների կապը մահացության և հիմնական սիրտ–անոթային հիվանդությունների հետ։

Ռիսկի գործոններն էին հիպերտոնիան, աբդոմինալ ճարպակալումը, տարրական կամ ավելի ցածր մակարդակի կրթությունը, ծխելը, դիսլիպիդեմիան, շաքարախտը, սննդի պատրաստման և ջեռուցման համար պինդ վառելանյութի օգտագործումը, ուժի պակասը, ֆիզիկական ցածր ակտիվությունը, վատ սննդակարգը, ընկճախտը, ալկոհոլի չարաշահումը և օրական վեց գրամից ավել աղի օգտագործումը։

Ուսումնասիրության 9,5 տարիների ընթացքում մահացության 10234 դեպք է գրանցվել և սիրտ–անոթային լուրջ հիվանդության 7980 դեպք, որոնցից 3559-ը սրտի նոպաներ և 3557-ը կաթվածներ են եղել։

Ինչպես պարզվել է, սիրտ–անոթային հիվանդությունների ամենամեծ ռիսկը կապված է վատ կրթության հետ։ Հեղինակներն ընդգծում են, որ իրենք չգիտեն, թե արդյոք դա կապված է կյանքի ցածր մակարդակի, բժշկության ոլորտում ձեռքբերումների վերաբերյալ վատ տեղեկացվածության հետ, թե ուրիշ այլ պատճառներ կան։ Հետազոտության մեջ հաշվի առնված ռիսկի 13 գործոններին բաժին է ընկել մահերի 72%-ը, ընդ որում, ամենամեծ ներդրում են ունեցել կրթության ցածր մակարդակը (16%), ծխելը (11%), հիպերտոնիան (10,9%), փայտի և ածուխի օգտագործումը (8,4%) և վատ սնունդը (7,9%):

Հետևիր մեզ TikTok-ում 😊

Կիսվել...