4 պատճառ, թե ինչով է շուն պահելը օգտակար

Շներն իրենց տերերին ոչ միայն շատ դրական հույզեր են հաղորդում, այլեւ դրականորեն են ազդում նրանց առողջության վրա։

Այս մասին ասվում է Circulation. Cardiovascular Quality and Outcomes ամսագրում հրապարակված վերջին ուսումնասիրության մեջ, որը ցույց է տվել, որ շուն ունենալը 24 տոկոսով նվազեցնում է ցանկացած պատճառով մահվան ռիսկը։

Մարդկանց մոտ, որոնք սրտի կաթված են տարել եւ ապրում են շան հետ, մահանալու ռիսկը 33 տոկոսով ավելի ցածր է, քան իրենց հասակակիցների մոտ, որոնք շուն չունեն, նշում են գիտնականները:

Այդպիսով, շուն պահելն ունի մի շարք առողջապահական օգուտներ: Ահա դրանցից մի քանիսը.

 

 

Քաշի կորուստ

Բնապահպան-կենսաբան Լորեն Ռոդսի խոսքով՝ շների տերերը ֆիզիկապես ավելի ակտիվ են, եւ դա դրականորեն է ազդում նրանց առողջության եւ մարզավիճակի վրա։

Հետազոտությունների համաձայն՝ մարդիկ, որոնք շաբաթական 5 օր օրական 20 րոպե զբոսնում են շան հետ, մեկ տարվա ընթացքում նիհարել են միջինը 7 կիլոգրամով: Ավելին, տերերը, որոնք զբոսնում են իրենց շներին, շատ ավելի հավանական է, որ հասնեն ֆիզիկական ակտիվության առաջարկված մակարդակին:

Սրտի առողջության բարելավում

Ստատինների ընդունումն արյան մեջ խոլեստերինի մակարդակն իջեցնելու միակ միջոցը չէ։ Ամերիկյան կարդիոլոգիական ասոցիացիան (AHA) նշում է, որ մի շարք հետազոտություններ ուսումնասիրել են շուն պահելու եւ սրտանոթային հիվանդությունների միջեւ կապը եւ պարզել, որ ընտանի կենդանիները կարողացել են նվազեցնել ռիսկերը:

Ալերգիայի նվազեցում

PLOS One ամսագրում հրապարակված ուսումնասիրությունը ցույց է տվել, որ երեխայի կյանքի առաջին տարում տանը ընտանի կենդանիներ ունենալը կարող է պաշտպանել ալերգիայի եւ ասթմայի զարգացումից:

Ավելի քիչ բժշկի այցելություններ

Համաձայն Journal of Personality and Social Psychology ամսագրում հրապարակված հետազոտության՝ շների տերերն ավելի քիչ հավանականությամբ են դիմել բժշկի: Կալիֆոռնիայից գիտնականները հետեւել են 1000 հիվանդի եւ պարզել, որ ընտանի կենդանիներ ունեցողները տարեկան միջինը 8,42 անգամ այցելում են բժշկի՝ ընտանի կենդանիներ չունեցող մարդկանց ՝ 9,49 անգամ այցելությունների դիմաց:

Հետևիր մեզ TikTok-ում 😊

Կիսվել...